Herzlich Wilkommen bei den

Mir si d Ämmekracher vo Däredinge

Nach dr Fasnacht 2003 hei es paari vo de Sprisseli autershauber us dr Chindergugge müesse usträtte. De het e Idee afo riife, säuber e Guggemusig z’gründe. Grad au drum, wüu die ehemaligi Guggemusig ihri Aktivitäte im Ämmedorf igstöut het. Vo däm Zitpunkt ah het me afo wärbe und Mitglider sueche. Am 23. Januar 2004 si mir de gebore worde. Vo de Gründer si hüt no vier Mitglieder aktiv derbi.
Dr ursprünglich Kracher-Leitsatz isch hüt no berächtigt: Jede, wo wott, cha bi üs mitmache. Drum si mir au hüt no e kunterbunt gmischti Truppe, wo jede si Platz cha finge. Drum hei mir au ungerem Johr e guete Zämehaut und luege, dass bi üs immer öppis los isch.
I dr Vorfasnachtszit nä mir a diverse Guggeträffe i dr Region teil oder es ziet üs ou chli witers wäg. So chas vorcho asme üs ou im Dütschefärnseh zgseh bechunnt, wenn mer im Schwarzwald z bsuech si oder ases üs id höchi ziet und mer mitem James Bond ufem Schildhorn brilliere.
Au wenn z Däredinge ar Fasnacht immer wie weniger los isch, wüu’s immer wie meh Narre id Stadt zieht, so pflege mir doch immer no s’Grundgrüscht für’ne tradtionelli Dorffasnacht.
So übernähme mir am Hilari d’Gmeindsgschäft mitem Schlüssu zum Gmeindshus und schicke dr Amme i Winterschlof. Am SchmuDo organisiere mir d’Chesslete und zieh mit üsne schrege Tön bis am Fasnachtssundi durs Wasseramt. Am Äschermittwuch wecke mir de dr Amme wider und gäbe ihm dr Schlüssu zum Gmeindshus zrugg. Nach dr katholische Herrefasnacht plampe mir de ar Autefasnacht im reformierte Oberaargau us oder gö öppe die ou no chli witers wäg.
Sit 1999 hange zwüsche Hilari und Äschermittwuch a de Kandelaber entlang dr Hauptachse im Dorf, farbigi Fasnachtsgroppe. Aune zäme hei Sponsore es Gsicht gäh. D’Groppezunft het mit däm Bruuch agfange und mir heis de irgendeinisch übernoh. Jedes Johr warte d’Däredinger druf und gö imene usgibige Spaziergang «ihre» Gropp go Sueche. Die ganze Fasnachtsfische wärde vo private Fasnächtler oder Firme gsponseret und zeige ihres Gsicht während dr ganze Fasnacht i de Strosse vo Däredinge.